काठमाडौं, १३ फागुन । तोकिएकै मितिमा प्रतिनिधिसभा निर्वाचन हुनेमा सरोकारवाला निकायहरू विश्वस्त देखिएका छन् ।
नेपाल कानून समाजले ३५ जिल्लाका ३३ स्थानीय तहमा गरेको अध्ययनअनुसार यही फागुन २१ गते निर्वाचन हुनेमा आम मतदाता, राजनीतिक दल, सुरक्षा निकाय र स्थानीय नेताहरूको बलियो विश्वास देखिएको हो ।
अध्ययन अनुसार ७१ प्रतिशत मतदाता समयमै निर्वाचन हुनेमा ढुक्क छन् भने १६–२९ वर्ष उमेर समूहका ७२ प्रतिशत युवा मतदाता बढी विश्वस्त देखिएका छन् ।
मधेस प्रदेशमा यो विश्वास ७९ प्रतिशत पुगेको छ। सुरक्षाकर्मीमध्ये ९१.७ प्रतिशतले तोकिएको मितिमै निर्वाचन हुने विश्वास व्यक्त गरेका छन् ।
सरकार, निर्वाचन आयोग र सुरक्षा निकायको तीव्र तयारी तथा अनुकूल राजनीतिक वातावरण निर्वाचन सुनिश्चित हुने प्रमुख आधारका रूपमा देखिएको छ ।
अध्ययनले केही सुरक्षा चुनौती र सामाजिक सञ्जालको दुरुपयोगको जोखिम औंल्याए पनि समग्रमा निर्वाचन समयमै हुने निष्कर्ष निकालेको छ ।
