काठमाडौं, २५ मंसिर । पूर्वराष्ट्रपति विद्यादेवी भण्डारीले जेन–जी आन्दोलनका क्रममा आगजनी र तोडफोडबाट क्षतिग्रस्त बनेको संघीय संसद भवनको आज अवलोकन गरेकी छन् ।
नयाँबानेश्वरस्थित संसद भवनमा पुगेकी भण्डारीले आन्दोलनका क्रममा भएको क्षतिको प्रत्यक्ष निरीक्षण गर्दै सुरक्षाका पक्ष, क्षतिको व्यापकता तथा पुनर्निर्माणपूर्व तयारीबारे जिम्मेवार निकायसँग जानकारी लिइन् ।
भाद्र २३ र २४ गते भएका तीव्र विरोध प्रदर्शनका क्रममा संसद भवन परिसरमा भीषण आगजनी र संरचनागत तोडफोड भएको थियो । भवनका केही भागबारमा आगलागीका कारण भौतिक संरचना कमजोर बनेको बताइँदै आएको छ । सोही अवस्थालाई नजिकबाट बुझ्न पूर्वराष्ट्रपति भण्डारी आज संसद परिसर पुगेकी हुन्।
अवलोकनका क्रममा प्रतिनिधिसभाका सभामुख देवराज घिमिरे र राष्ट्रियसभाका अध्यक्ष नरायण दाहाल पनि उपस्थित थिए । अध्यक्षहरूले भण्डारीलाई संसद परिसरमा थप सुरक्षा कडाइ गरिएको, संवेदनशील क्षेत्रको पुनः डिजाइन आवश्यक परेको तथा द्रुतगति पूर्वाधार मर्मतका लागि सम्बन्धित निकाय परिचालित भइसकेको जानकारी गराएका थिए ।
