सिरहा, २५ मंसिर । जिल्ला प्रहरी कार्यालय सिरहाले स्रोत नखुलेको सात लाख रुपैयाँ सहित एक व्यक्तिलाई पक्राउ गरेको जनाएको छ ।
प्रहरीका अनुसार मङ्सिर २३ गते दिउँसो करिब १२ः३० बजे विशेष सूचनाका आधारमा सिरहाको बरियारपट्टी गाउँपालिका–२ मा संयुक्त प्रहरी टोली परिचालन गरिएको थियो ।
इलाका प्रहरी कार्यालय महेशपुरपतार तथा प्रहरी चौकी कचनारीबाट खटिएको टोलीले भारतबाट नेपालतर्फ प्रवेश गर्दै गरेको बीआर ३२ एडब्लु ८३७७ नम्बरको स्कुटी रोकेर चेकजाँच गरेको थियो।
सो समयमा स्कुटीको डिकीभित्र लुकाएर राखिएको नेपाली रुपैयाँ ७,००,००० (सात लाख) फेला परेको प्रहरीले जनाएको हो । घटनामा संलग्न स्कुटी चालक सिरहा बरियारपट्टी–३ निवासी ४६ वर्षीय दिनेश महतोलाई तत्काल नियन्त्रणमा लिएर स्कुटी र नगद समेत बरामद गरिएको छ ।
प्रहरीले उक्त रकमको स्रोत खुल्न बाँकी रहेको र यो प्रकरण अन्य कुनै अवैध गतिविधिसँग सम्बन्धित छ कि भनेर थप अनुसन्धान भइरहेको जनाएको छ ।
