काठमाडौं, २५ मंसिर । भारतको गोवास्थित नाइट क्लबमा भएको भीषण आगलागीमा ज्यान गुमाएका पाँच नेपालीको पहिचान पुष्टि भएको छ ।
दाङका चुर्णबहादुर पुन, सिन्धुलीका लिलबहादुर कटुवाल, झापाका सविन विश्वकर्मा र सुदीप विश्वकर्मा तथा डडेलधुराका मनोज जोराको शव नेपाल ल्याउने तयारी भइरहेको परराष्ट्र मन्त्रालयले जनाएको छ ।
नाइट क्लबमा मध्यराति आगलागी हुनुका साथै ग्यास सिलिन्डर विस्फोट हुँदा २५ जनाको मृत्यु भएको थियो । साँघुरा बाटो र कमजोर सुरक्षाका कारण उद्धार ढिलो भएको प्रारम्भिक अनुसन्धानले देखाएको छ ।
क्लब अवैध रूपमा संचालन भएको र सुरक्षा मापदण्ड नमानिएको पाइएको छ । घटनामा संलग्न क्लबका प्रबन्धकसहित चार जना पक्राउ परेका छन्, र मालिकहरूविरुद्ध मुद्दा दर्ता गरिएको छ।
गोवा सरकारले मृतक परिवारलाई पाँच लाख र घाइतेलाई ५० हजार रुपैयाँ दिने घोषणा गरेको छ ।
