जनकपुर, २५ मंसिर । सांस्कृतिक आदानप्रदान दुई देशबीचको सम्बन्ध सुदृढ गर्ने महत्वपूर्ण माध्यम भएको उल्लेख गर्दै भारतीय महावाणिज्य दूतावास वीरगञ्जका महावाणिज्यदूत देवीसहाय मिणाले भारत–नेपाल मैत्री सम्बन्धलाई अझ सबल बनाउने प्रतिवद्धता व्यक्त गरेका छन्।
वीरगञ्जस्थित भारतीय महावाणिज्य दूतावासले बिहीबार जनकपुरमा आयोजना गरेको ओडिसी ‘डिसी’ नृत्य प्रस्तुति कार्यक्रममा सन्ध्या कुञ्जन मेनन दास नेतृत्वको समूहले भारतीय शास्त्रीय नृत्यका विविध रूप प्रस्तुत गरेका थिए।
आकर्षक भाव–भंगी, कथागाथा र शास्त्रीय संगीतको संगमले दर्शकलाई मन्त्रमुग्ध बनाएको थियो। कार्यक्रममा बोल्दै महावाणिज्यदूत मिणाले ऐतिहासिक, धार्मिक र सांस्कृतिक पृष्ठभूमिबाट नै भारत–नेपालबीचको गहिरो सम्बन्ध रहेको उल्लेख गर्दै यस किसिमका सांस्कृतिक गतिविधिले जन–जनबीचको आत्मीयता अझ पक्का बनाउने बताए।
उनले दूतावासले आगामी दिनमा पनि कला, संस्कृति तथा मैत्री सम्बन्ध प्रवर्द्धनका उद्देश्यले निरन्तर कार्यक्रम सञ्चालन गरिरहने प्रतिवद्धता व्यक्त गरे।
जनकपुर उपमहानगरपालिकाका मेयर मनोज साहले कला र संस्कृति कुनै पनि समाजको पहिचान तथा गौरव भएको उल्लेख गर्दै भारत–नेपालबीचको सांस्कृतिक सहकार्यले दुवै देशका नागरिकबीच सद्भाव, आपसी समझदारी र निकटता वृद्धि भएको बताए।
उनले उपमहानगरपालिकाको तर्फबाट सांस्कृतिक संरक्षण तथा प्रवर्द्धनमा निरन्तर सहयोग गर्ने आश्वासन पनि दिए।
कार्यक्रममा स्थानीय प्रशासनका प्रतिनिधि, समाजसेवी, कलाकार, सञ्चारकर्मी तथा सर्वसाधारणको उल्लेख्य उपस्थिति रहेको थियो।
