महोत्तरी, २५ मंसिर । जलेश्वर नगरपालिकाका सफाईकर्मीहरूले सात महिनादेखि तलब नपाएको विरोधमा बुधवार नगरपालिका कार्यालय अगाडि प्रदर्शन गरेका छन् ।
उनीहरूले काम नियमित रूपमा गर्दै आएको भए पनि दीर्घ समयदेखि पारिश्रमिक रोकिँदा परिवार पाल्न समेत समस्या परेको गुनासो गरेका छन् ।
सफाईकर्मीहरूले नगरपालिकाको प्रशासनलाई पटक–पटक तलबको माग गर्दा पनि वेवास्ता भएको आरोप लगाएका छन् । प्रदर्शनमा सहभागी किसन मेस्तर र सुरज मेस्तरले तत्काल बक्यौता तलब उपलब्ध गराउन र भविष्यमा नियमित पारिश्रमिकको व्यवस्था मिलाउन सरकार र स्थानीय प्रशासनसमक्ष स्पष्ट माग राखेका छन् ।
साथै, उनीहरूले यदि माग पूरा नभए आन्दोलनको रुप बढाउने चेतावनीसमेत दिएका छन् । यो कदमले स्थानीय प्रशासनमा दबाब सिर्जना गर्दै कर्मचारी अधिकारको पक्षमा कदम चाल्न आवश्यक भएको देखाएको छ ।
