काठमाडौं, २४ मंसिर । नेकपा (प्रचण्ड–माधव समूह) ले नेपाली कांग्रेससँग राष्ट्रियसभा चुनाव र प्रदेश सरकारहरूमा सहकार्य गर्ने प्रयास तीव्र पारेको छ ।
मधेस प्रदेशमा कांग्रेस नेतृत्वमा बनेको सरकारलाई आधार बनाई यो सहयोग अन्य प्रदेशमा विस्तार गर्नेबारे आन्तरिक छलफल सुरु भएको नेकपाका नेताहरू बताउँछन् ।
यसैबीच, एमाले अध्यक्ष ओलीले पनि कांग्रेस सभापति देउवासँग भेटेर प्रदेश सरकार र राष्ट्रियसभा चुनावमा एमाले–कांग्रेस सहकार्य निरन्तरता दिन प्रस्ताव गरेका छन् ।
तर देउवाले स्पष्ट जवाफ दिएका छैनन् । कांग्रेस प्रतिनिधिहरूले राष्ट्रीयसभा चुनावमा कुनै न कुनै दलसँग गठबन्धन आवश्यक हुने बताइरहेका छन् ।
तर प्रतिनिधिसभा पुनःस्थापनाको मुद्दामा कांग्रेस–एमाले एक तर्फ र नेकपा अर्कोतर्फ रहेकाले सहकार्य टुङ्गिन कठिन देखिन्छ । नेकपा भने चुनावको पक्षमा स्पष्ट उभिएको छ, जबकि कांग्रेस–एमाले पुनःस्थापनाका लागि सर्वोच्च अदालत पुगेका छन् ।
गठबन्धन समीकरण फेरबदल भइरहेको यो अवस्थालाई मध्यनजर गर्दै दुवै पक्षले आगामी प्रदेश सरकार र राष्ट्रियसभा चुनावलाई लक्षित गरेर ‘कससँग सहकार्य गर्दा बढी फाइदा’ हुने आ–आफ्नो हिसाब–किताब गरिरहेका छन् ।
