काठमाडौं, २३ मंसिर । ऊर्जा, जलस्रोत तथा सिँचाइमन्त्री कुलमान घिसिङले पदस्थापनसम्बन्धी निर्णयहरू आफूले कुनै प्रतिशोध वा पूर्वाग्रहका आधारमा नगरेको स्पष्ट पारेका छन् ।
एक कार्यक्रममा बोल्दै उनले आफ्नो उद्देश्य परिणाममुखी काम गर्ने र योग्य व्यक्तिलाई सही स्थानमा राख्ने रहेको बताए ।
उनका अनुसार तत्कालीन कार्यकारी निर्देशक हितेन्द्रदेव शाक्यको सरुवा शाक्य स्वयंले ‘मैले सकिनँ, सरुवा गरिदिए हुन्छ’ भनेपछि मात्र गरिएको हो, प्रतिशोधका कारण होइन ।
उनले अदालतको आदेशलाई सम्मान गर्ने बताए तर काम नगर्ने र निर्णय लिन नसक्नेलाई भने छुट नदिइने स्पष्ट गरे ।
मन्त्री घिसिङले आयोजना समयमै सम्पन्न गर्न निर्माण व्यवसायी, परामर्शदाता र सरकारी निकायबीच समन्वय अपरिहार्य भएको उल्लेख गर्दै ढिलाइले देशलाई ठूलो आर्थिक क्षति हुने चेतावनी दिए ।
