हेटौंडा, २० मंसिर। सडक डिभिजन हेटौंडाले शनिबार बिहानैबाट हेटौंडा उपमहानगरको मुख्यबजार क्षेत्रमा सडक विस्तार कार्य सुरु गर्दै घरटहरा र संरचना भत्काएको छ।
महेन्द्र राजमार्ग र त्रिभुवन राजपथका करिब ८.५ किलोमिटर सडक खण्डमा केन्द्ररेखाबाट २५–२५ गजभित्र पर्ने संरचना हटाइएका छन्।
यस क्रममा आधा दर्जनभन्दा बढी ठूला उपकरण प्रयोग गरिएको छ भने सयौंको संख्यामा जनपथ तथा सशस्त्र प्रहरी परिचालन गरिएको थियो।
यसअघि सडक सीमाभित्रका संरचना हटाउन १५ दिने अल्टिमेटम दिइएको थियो। सडक डिभिजनका अनुसार करिब ५३१ वटा घर, टहरा तथा संरचना भत्काउनु पर्नेछ।
यता, सर्वोच्च अदालतले सडक विस्तारसम्बन्धी सूचना कार्यान्वयन नगर्न आदेश दिएको भए पनि आदेश औपचारिक रूपमा नआएको भन्दै सडक डिभिजनले काम सुरु गरेको जनाएको छ।
