जनकपुर, १९ मंसिर । मधेस प्रदेशका मुख्यमन्त्री सरोज कुमार यादवले पदबाट राजीनामा दिएपछि प्रदेशमा नयाँ सरकार गठन प्रक्रियाले तीव्रता पाएको छ ।
संविधान अनुसार मुख्यमन्त्रीका लागि दाबी पेश गर्न निर्धारित म्याद आज साँझ ५ बजे सकिँदैछ, तर प्रमुख दलहरूबीच सहमति बन्न नसक्दा मधेसको सत्ता समीकरण अनिश्चित बनेको छ ।
नेपाली कांग्रेस र लोकतनत्रिक समाजवादी पार्टी (लोसपा) दुवैले सरकार गठनमा नेतृत्व माग्दै अडान कडा बनाएका छन् । कांग्रेसले नेता कृष्ण यादवलाई मुख्यमन्त्रीका रूपमा अघि सारेको छ भने लोसपाले जितेन्द्र सोनललाई नै दाबी गर्ने भएको छ ।
बिहीबारदेखि लगातार सात दलीय गठबन्धनबीच छलफल भए पनि कुनै साझा निष्कर्षमा पुग्न नसकेको स्रोतले बताएका छन् । सहमति जुटाउन आज पनि दलहरूबीच वार्ता जारी छ, तर दाबी पेशको समय सीमित बन्दै गएपछि राजनीतिक दबाब थपिएको छ ।
अर्कोतर्फ प्रदेशमा स्थिरता कायम राख्न दलहरूबीच सहमति आवश्यक पर्ने टिप्पणी राजनीतिक विश्लेषकहरूले गरेका छन् ।
यदि आज बेलुकीसम्म कुनै दलले स्पष्ट बहुमतसहित दाबी पेश गर्न नसकेमा पुनः नयाँ राजनीतिक प्रक्रियाहरू सक्रिय हुने अनुमान गरिएको छ ।
