जनकपुर, ७ कात्तिक। आगामी छठ पर्वलाई लक्षित गर्दै जनकपुरधाम ९ साकेतनगरमा रहेको ऐतिहासिक पाकबतीसर पोखरीको सरसफाइ कार्य सुरु गरिएको छ। स्थानिय बासिन्दा तथा युवाहरूको पहलमा पोखरी सफा अभियान सञ्चालन गरिएको हो।
स्थानीय अनिल झालेका अनुसार विगत लामो समयदेखि यस पोखरीमा फोहर र दुर्गन्ध फैलिएको थियो, जसले आसपासका बासिन्दा तथा छठ मनाउने श्रद्धालुहरूलाई समस्या भइरहेको थियो। उनले भने, “छठ पर्व नजिकिँदै गर्दा हामीले आफैं मिलेर सफाइ सुरु गरेका हौं ताकि श्रद्धालुहरू सहज रूपमा पूजा अर्चना गर्न सकून्।” छठ पर्वका अवसरमा हजारौं श्रद्धालुहरूले यस पोखरीमा सूर्यदेवको आराधना गर्ने परम्परा रहेको छ। स्थानीयले नगरपालिकालाई स्थायी सरसफाइ र व्यवस्थापनको पहल गर्न पनि आग्रह गरेका छन्।
