काठमाडौँ, २३ असोज । राप्ती स्वास्थ्य विज्ञान प्रतिष्ठानकी पूर्व उपकुलपति डा. सङ्गीता भण्डारीसहित १३ जनामाथि विशेष अदालतमा भ्रष्टाचार मुद्दा दर्ता भएको छ ।
अख्तियार दुरुपयोग अनुसन्धान आयोगका प्रवक्ता राजेन्द्रकुमार पौडेलका अनुसार डा. भण्डारीमाथि एमआरआई मेसिन खरिदमा अनियमितता गर्दै करिब १२ करोड ७ लाख ६० हजार ९ सय ४६ रुपैयाँ भ्रष्टाचार गरेको आरोपमा मुद्दा दायर गरिएको हो ।
अख्तियारको अनुसन्धानले सो खरिद प्रक्रियामा ठुलो घोटाला भएको निष्कर्ष निकालेको छ ।
उक्त मुद्दामा राप्ती स्वास्थ्य विज्ञान प्रतिष्ठानका तत्कालीन कार्यवाहक रजिष्ट्रार झन्कार लामिछाने, तत्कालीन फाइनान्स मेनेजर कैलाशप्रसाद देव, बायोमेडिकल इन्जिनियर शरद भण्डारी, काठमाडौँका बायोमेडिकल इन्जिनियर अमितकुमार चौधरी र डेपुटी फाइनान्स मेनेजर नितिन कुर्मी पनि प्रतिवादी बनाइएको छ ।
त्यसैगरी शाखा अधिकृत छायाँ डिसी, शाखा अधिकृत श्रीराम चौधरी, हिरालाल भण्डारी, तत्कालीन सिभिल इन्जिनियर मदन भण्डारी, वरिष्ठ सहायक अन्जु शर्मा, बायोमेडिकल इन्जिनियर सुजाता भट्टराई, लुम्बिनी हेल्थकेयर प्रालि तथा सो कम्पनीका अध्यक्ष पोस्ट राज ज्ञवालीमाथि समेत सोही रकम बिगो दाबी गर्दै मुद्दा दर्ता गरिएको अख्तियारले बताएको छ ।
