काठमाडौं, २२ असोज । प्रधानमन्त्री निवास बालुवाटारमा सोमबार राति १० बजेदेखि मंगलबार बिहान ३ बजेसम्म प्रधानमन्त्री सुशीला कार्की, गृहमन्त्री ओमप्रकाश अर्याल तथा सुरक्षा निकाय प्रमुखहरूको बैठकमा हाल देशमा उत्पन्न सुरक्षा चुनौतीबारे समीक्षा भएको छ ।
बैठकमा जेन–जी आन्दोलनपछि पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलगायतलाई पक्राउ गर्न बढ्दो दबाबका कारण उत्पन्न हुनसक्ने राजनीतिक र सामाजिक जोखिमबारे गम्भीर छलफल भएको छ ।
सुरक्षा प्रमुखहरूले राजनीतिक नेताहरूको गिरफ्तारीले दंगा भड्किन सक्ने, दलहरू सडकमा उत्रिन सक्ने, धार्मिक सद्भावमा असर पर्न सक्ने, र निर्वाचन प्रक्रिया अवरुद्ध हुन सक्ने चेतावनी दिएका थिए ।
प्रधानमन्त्री र गृहमन्त्रीले कानुनी प्रक्रिया र न्यायिक आयोगको प्रतिवेदनपछि मात्र कारबाहीको निर्णय लिनुपर्ने धारणा व्यक्त गरे । बैठकमा सहभागीहरूका अनुसार सरकारले हाल “पर्ख र हेर“ नीति अपनाउने निष्कर्षमा पुगेको छ ।
यसैबीच, मंगलबार जेन–जी आन्दोलनकर्ताहरूले ओली, लेखकलगायतविरुद्ध जाहेरी लिएर प्रहरीसमक्ष पुगे पनि प्रहरी प्रशासनले तत्काल दर्ता नगरी आयोगमा पठाउने भनिएको छ ।
गत २३ र २४ भदौमा जेन–जी आन्दोलनको क्रममा प्रहरीको गोलीबाट कम्तीमा ७६ जनाको मृत्यु भएको थियो, जसले देशव्यापी असन्तोष सिर्जना गरेको छ ।
