काठमाडौँ, ११ भदौ । प्रधानमन्त्री केपी शर्मा ओलीविरुद्ध दायर विश्वासको मत सम्बन्धी रिट सर्वोच्च अदालतको न्यायाधीश महेश शर्मा पौडेल र नृपध्वज निरौलाको संयुक्त इजलासमा सुनुवाइ हुने भएका छन् ।
अधिवक्ता वीरेन्द्र केसीले दायर गरेको उक्त रिटमा गत शुक्रबार न्यायाधीश सुनिलकुमार पोखरेलको एकल इजलासले चारवटा संवैधानिक प्रश्न उठाउँदै प्रधानमन्त्री, सभामुखलगायतलाई लिखित जवाफ पेस गर्न आदेश दिएका थिए ।
सत्तारुढ गठबन्धनमै रहेका दलहरूले समर्थन फिर्ता लिएपछि प्रधानमन्त्रीले विश्वासको मत नलिएको अवस्थामा सरकार कानुनी रूपमा कामचलाउ मात्र हुने कि नहुने भन्ने विषयमा अदालतमा प्रश्न उठेको छ ।
जनता समाजवादी पार्टी नेपालले सरकारलाई दिएको समर्थन फिर्ता लिएको र सरकारमै सहभागी नागरिक उन्मुक्ति पार्टीले पनि समर्थन परित्याग गरेको तथ्यलाई आधार मानेर मुद्दा दायर गरिएका छन् ।
