सर्लाही, २ भादौ । सर्लाहीको हरिपुर्वा नगरपालिका–६ मा साउन ३० गते राति गोली प्रहारबाट मारिएका रामपुकार रायको हत्या घटनामा सनसनीपूर्ण खुलासा भएको छ ।
प्रहरी अनुसन्धान अनुसार रामपुकारको हत्या आफ्नै श्रीमतीको हत्या आरोपमा फरार रहेका धीरेन्द्र रायले गरेका हुन् । घटनामा संलग्न बीआर ३० एजी २३५४ नम्बरको मोटरसाइकल चलाइरहेका हरिपुर्वा–५ निवासी २६ वर्षीय धीरेन्द्र राय (उर्फ धर्मेन्द्र) घाइते अवस्थामा पक्राउ परेका छन् ।
उनीहरू चढेको मोटरसाइकल भाग्ने क्रममा दुर्घटना हुँदा धीरेन्द्र पक्राउ परेका हुन् भने गोली प्रहार गर्ने व्यक्ति भने फरार छन् । घटनास्थलबाट गोलीको खोका बरामद भएको छ ।
धीरेन्द्रको डेराबाट प्रहरीले नलकटुवा पेस्तोल र अर्को गोलीको खोका फेला पारेको छ । घटनाबारे थप अनुसन्धान जारी छ ।
रामपुकारको हत्या यसअघि धीरेन्द्रले गरेकी श्रीमती चित्रलेखा कुमारी यादवको हत्या प्रकरणसँग पनि जोडिएको आशंका प्रहरीले व्यक्त गरेको छ ।
