रौतहट, २ असार । रौतहटको बौधीमाई नगर क्षेत्रमा करेन्ट लागेर २ जना युवकको मृत्यु भएको छ ।
मृत्यु हुनेहरुमा बौधिमाई ५ को पवागाउँका २५ वर्षीय अरुण साह र २६ वर्षीय सिताबी पण्डित रहेको जिल्ला प्रहरी कार्यालय रौतहटका प्रवक्ता डिएसपी उमाशंकर यादवले जानकारी दिनुभएको छ ।
शुक्रबार राति साढे ८ बजे घरको आँगनमा रहेको ट्युबवेल धारामा मोटर सञ्चालन गर्ने क्रममा साहलाई करेन्ट लागेको थियो । करेन्ट लागेका साहलाई पण्डितले बचाउन खोज्दा उनलाई पनि करेन्ट लागेर दुवै जना अचेत भएका थिए ।
दुवै जनालाई उपचारको लागि तत्काल प्रादेशिक अस्पताल गौर लैजाँदा चिकित्सकले दुवै जनालाई मृत घोषणा गरेको प्रवक्ता यादवले जानकारी दिएका छन ।
