नवीन र मुन्जयलाई धम्की

जनकपुरधाम १३ पुस । अस्पताल र चिकित्सकको लापरबाहिका कारण जनकपुरधाममा एक व्यक्तिको खुट्टा काट्नुपरेको घटनापछि पीडितहरूका अभिभावक बनेका अभियन्ता नवीन यादव र मुञ्जय राउतलाई कुटपिट गर्ने धम्की दिइएको छ । यादव , राउत र रञ्जित दास सँगै भएकै बखतमा दासलाई एक व्यक्तिले फोन गरी अभ्रद शैलीमा अपशब्द प्रयोग गर्दै यादव र राउतलाई कुटपिट गर्ने धम्की दिएका हुन् । जनकपुर अञ्चल अस्पतालमा केही दिनअघि उपचारका लागि भर्ना भएका जनकपुरधाम उपमहानगरपालिका–२५ लोहनाका अमित पासवानलाई दलालहरूले जनकपुरधामकै दैविक इन्टरनेशनल हस्पिटल पुर्याएका थिए । जहाँ अस्पताल प्रशासन र चिकित्सकको लापरबाहीका कारण शिकिस्त अवस्थामा पुगेका पासवानको काठमाडौंको बि.एन्ड.बी अस्पतालमा दायाँ खुट्टा काट्नुपरेको थियो । एउटा दुर्घटनामा परी खुट्टामा चोट लागेका पासवानको उपचारमा ढिलाइ गरी खुट्टा काट्ने अवस्थामा पुर्याएको पीडित पक्षको भनाइ छ । पीडित पक्षले जनकपुरधाममा पत्रकार सम्मेलन गरी दैविक हस्पिटलमा दुर्घटनामा घाइते पासवानको चोटग्रश्त खुट्टामा घरि हिटरले त घरि बरफले सेकी निको पार्न खोजिएको तर त्रुटिपूर्ण उपचारका क्रममा निको हुने अवस्था नदेखिएपछि अस्पतालले डिस्चार्ज गरेको थियो । दुर्घटनाका घाइते पासवानलाई उपचारमा लामो समय राखेर बढी रकम तिराउन खोजिएको थियो । तर, अस्पतालले घाइतेको स्थिति बिग्रिन थालेपछि र उनी आर्थिक रूपमा कमजोर भएकाले रकमसमेत तिर्न नसक्ने लेखाजोखा गरेर उनलाई डिस्चार्ज गरेको थियो, पासवानलाई न्याय दिलाउने अभियानका अगुवा राउतले भनेः अभियन्ता राउतलाई धम्की दिएका व्यक्ति दैविक अस्पतालनिकट रहेको छ ।