काठमाडौं, ३ मंसिर । परराष्ट्रमन्त्री शिशिर खनालले तातोपानी नाका तत्काल सञ्चालनमा ल्याउन नेपालका लागि चिनियाँ राजदूत चाङ माओमिङसँग आग्रह गरेका छन्।
सिंहदरबारस्थित परराष्ट्र मन्त्रालयमा भएको भेटमा मन्त्री खनालले बाढीका कारण रसुवागढी नाका अवरुद्ध रहेको र हिउँदमा अन्य हिमाली नाकासमेत प्रभावित हुन सक्ने भएकाले तातोपानी नाका सञ्चालन आवश्यक रहेको बताए।
उनले तातोपानी नाका दुई देशबीचको ऐतिहासिक सम्बन्ध र व्यापारिक आवागमन सहज बनाउने महत्वपूर्ण माध्यम भएको उल्लेख गरे।
जवाफमा चिनियाँ राजदूत चाङले नाका सञ्चालनका लागि सम्बन्धित निकायसँग समन्वय गर्ने प्रतिबद्धता जनाए। भेटमा बाढीपछिको पुनर्निर्माण तथा द्विपक्षीय हितका विषयमा समेत छलफल भएको परराष्ट्रमन्त्रीको सचिवालयले जनाएको छ।














