काठमाडौं, ७ कात्तिक । फिलिपिन्समा सैन्य तालिमका क्रममा वायुसेनाका दुई विमान आपसमा ठोक्किँदा चार जना पाइलटको मृत्यु भएको छ।
स्थानीय समयअनुसार शुक्रबार दिउँसो ३ः५१ बजे मनिलाको दक्षिणमा रहेको लिपा सहरस्थित फर्नान्डो एयर बेस नजिकै दुर्घटना भएको हो। कम उचाइमा उडिरहेका दुवै एसएफ–२६० विमान ठोक्किएका थिए। दुर्घटनापछि एउटा विमानको भग्नावशेष सैनिक ब्यारेक नजिक खसेको थियो।
घटनापछि फिलिपिन्सको वायुसेनाले एसएफ–२६० विमानको उडानमा रोक लगाउँदै अनुसन्धान पूरा नभएसम्म सञ्चालन नगर्ने निर्णय गरेको छ।
इटालीमा निर्मित यी विमान फिलिपिन्सले सन् २०१०–११ मा १८ वटा खरिद गरेको थियो। पाइलटलाई उडान तालिम दिन प्रयोग गरिने यी विमान दुर्घटनाले सैन्य उड्डयन सुरक्षामाथि प्रश्न उठाएको छ।
चीनसँग दक्षिण चीन सागरमा बढ्दो तनावका बीच फिलिपिन्सले सैन्य क्षमता विस्तार गर्न खोजिरहेको छ। तर बजेट अभाव र योजनामा हुने ढिलाइका कारण सैन्य आधुनिकीकरण चुनौतीपूर्ण बन्दै आएको छ।
