काठमाडौं, २ कात्तिक । फ्रान्समा महँगी र शिक्षा क्षेत्रको अवस्थालाई लिएर सुरु भएको विरोध प्रदर्शन हिंसात्मक बनेको छ।
प्रदर्शनका क्रममा आगजनी, तोडफोड र लुटपाट भएपछि प्रहरीले २ हजार ३०० भन्दा बढी व्यक्तिलाई पक्राउ गरेको अन्तर्राष्ट्रिय सञ्चारमाध्यमले जनाएका छन्।
पेरिससहित विभिन्न क्षेत्रमा प्रदर्शनकारी र प्रहरीबीच झडप भएको छ। केही भवन तथा पसलमा आगजनी र तोडफोड भएको छ भने लिमोजेसको टाउन हलमा समेत आगलागी भएको समाचारमा उल्लेख छ। शनिबार पेरिसका पूर्वी र उत्तरी क्षेत्रमा हजारौँ मानिस प्रदर्शनमा सहभागी भएका थिए।
फक्स न्युज डिजिटलको एक रिपोर्टले आन्दोलनलाई समर्थन गर्ने ५० वटा संगठन पहिचान गरेको दाबी गरेको छ। तीमध्ये विद्यार्थी तथा युवा समूहसँगै श्रमिक युनियन, राजनीतिक दल र नागरिक अधिकारसम्बन्धी संगठन रहेको रिपोर्टमा उल्लेख छ। यद्यपि, आन्दोलनलाई राजनीतिक समूहहरूले परिचालन गरेको भन्ने दाबी स्वतन्त्र रूपमा पुष्टि भएको छैन।
यसैबीच, फ्रान्सका राष्ट्रपति इमानुएल म्याक्रोंले हिंसाको कुनै औचित्य नरहेको बताएका छन्। उनले हिंसात्मक गतिविधिको विरोध गर्दै शान्ति र कानुनी व्यवस्थाको पक्षमा आफ्नो धारणा राखेका हुन्।
अमेरिकी विदेश मन्त्रालयका उपसचिव ज्याकब हेलबर्गले पनि अन्तरदेशीय सञ्जालमार्फत राजनीतिक हिंसा फैलिएको आरोप लगाउँदै त्यस्ता गतिविधिमा संलग्न समूहको आर्थिक स्रोत र सञ्चालन प्रणालीमाथि कारबाही गर्नुपर्ने बताएका छन्।
हेलबर्गले राजनीतिक हिंसा र आर्थिक कठिनाइविरुद्ध गरिने शान्तिपूर्ण प्रदर्शनलाई एउटै रूपमा हेर्न नहुने धारणा राखेका छन्। फ्रान्समा भने प्रदर्शनको कारण बनेका महँगी र शिक्षा क्षेत्रका समस्याबारे असन्तुष्टि कायमै रहेको समाचारमा उल्लेख छ।
