काठमाडौं, १ कार्तिक । बढ्दो महँगी, असमानता र सार्वजनिक सेवामा कटौतीको विरोधमा फ्रान्समा भएको देशव्यापी प्रदर्शन हिंसात्मक बनेको छ।
प्रदर्शनका क्रममा एक जनाको मृत्यु भएको छ भने ५०० भन्दा बढी सुरक्षाकर्मी घाइते भएका छन्। प्रहरीले १ हजार ८०० भन्दा बढी प्रदर्शनकारीलाई पक्राउ गरेको छ।
शनिबार विभिन्न सहरमा भएका प्रदर्शनका क्रममा तोडफोड, आगजनी र लुटपाटका घटना भएका छन्। राजधानी पेरिसमा मात्रै ८५५ जना पक्राउ परेका छन्। दक्षिणपश्चिमी सहर लिमोगेसको ऐतिहासिक टाउन हलमा आगजनी भएको छ भने बोर्डियोसहित अन्य सहरका पसलमा पनि क्षति पुगेको छ।
विद्यालयमा शिक्षक अभाव र सार्वजनिक सेवासम्बन्धी असन्तुष्टिबाट सुरु भएको आन्दोलन पछिल्लो समय महँगी, आर्थिक असमानता र सरकारी खर्च कटौतीविरुद्ध फैलिएको हो।
हिंसात्मक घटनापछि फ्रान्सेली सरकारले दोषीमाथि कारबाही गर्ने र प्रभावित व्यवसायीलाई राहत दिने जनाएको छ। बढ्दो तनावबीच राष्ट्रपति इम्यानुएल म्याक्रोनले राष्ट्रका नाममा सम्बोधन गर्ने कार्यक्रम रहेको छ।
यस प्रदर्शनले आगामी राष्ट्रपति निर्वाचनको तयारी भइरहेका बेला म्याक्रोन सरकारमाथि थप राजनीतिक दबाब सिर्जना गरेको छ।
