काठमाडौं, १ कात्तिक । बढ्दो महँगी, विद्यालयमा शिक्षक अभाव र कमजोर भौतिक पूर्वाधारको विरोधमा फ्रान्सभर भएको प्रदर्शन हिंसात्मक बनेको छ।
प्रदर्शनका क्रममा प्रहरीले १ हजार २ सयभन्दा बढीलाई पक्राउ गरेको छ भने १५० जना सुरक्षाकर्मी घाइते भएका छन्।
बीबीसीका अनुसार आन्दोलनमा करिब ५ लाख ५० हजार मानिस सहभागी भएका थिए।
राजधानी पेरिससहित विभिन्न सहरमा प्रदर्शनकारीले सवारीसाधनमा आगजनी, पसलमा तोडफोड र लुटपाट गरेका छन्। केही सरकारी तथा ऐतिहासिक भवनमा समेत आगजनी भएको छ।
माध्यमिक विद्यालयमा शिक्षकको अभाव र कमजोर पूर्वाधारलाई लिएर सुरु भएको आन्दोलनमा ट्रेड युनियन तथा अन्य समूह सहभागी भएपछि प्रदर्शन देशव्यापी बनेको हो।
राष्ट्रपति इमानुएल म्याक्रोँले हिंसा, आगजनी र लुटपाटमा संलग्नमाथि कडा कानुनी कारबाही गर्ने चेतावनी दिएका छन्। सरकारले विद्यालयमा ३ हजार अस्थायी शिक्षक थप गर्ने घोषणा गरे पनि प्रदर्शन रोकिएको छैन।
