जनकपुरधाम, २६ असोज । सामाजिक सञ्जालमा हतियार प्रदर्शन गरी डरत्रास फैलाउने सामग्री पोस्ट गरेको आरोपमा धनुषा प्रहरीले दुई युवकलाई पक्राउ गरेको छ ।
जिल्ला प्रहरी कार्यालय धनुषाका अनुसार पक्राउ पर्नेमा जनकपुरधाम उपमहानगरपालिका-१९ का २१ वर्षीय पशुपति पासवान र वडा नम्बर १३ का करिब १८ वर्षीय सुमन पटेल रहेका छन् ।
प्रहरीका अनुसार पासवानले टिकटकमा डरत्रास र धाकधम्की झल्किने भिडियो पोस्ट गरेको आरोप छ ।
त्यस्तै, पटेलले फेसबुकमा खुकुरीजस्तो धारिलो हतियार देखाइएको आपत्तिजनक तस्बिर राखेको आरोपमा पक्राउ परेका हुन् ।
धनुषाका प्रहरी प्रवक्ता प्रहरी नायब उपरीक्षक ओमप्रकाश खनालका अनुसार पासवानलाई सोमबार बिहान करिब साढे ८ बजे घरबाटै पक्राउ गरिएको हो ।
पटेललाई भने आइतबार साँझ करिब साढे ५ बजे नियन्त्रणमा लिइएको प्रहरीले जनाएको छ । घटनाबारे थप अनुसन्धान भइरहेको जिल्ला प्रहरी कार्यालय धनुषाले जानकारी दिएको छ ।
