जनकपुरधाम, २४ असोज । धनुषामा बढ्दो लागुऔषध दुव्र्यसन, सामाजिक सञ्जालको दुरुपयोग तथा त्यसबाट उत्पन्न हुन सक्ने आपराधिक गतिविधि नियन्त्रण गर्न जनसरोकार अभियानÚले सरकारसँग प्रभावकारी कदम चाल्न माग गरेको छ ।
अभियानले जिल्ला प्रशासन कार्यालय धनुषामार्फत गृहमन्त्रीलाई ज्ञापनपत्र बुझाउँदै जिल्लाको शान्ति सुरक्षा सुदृढ बनाउन, लागुऔषधको अवैध कारोबार नियन्त्रण गर्न तथा सामाजिक सञ्जालमार्फत हुने गैरकानुनी गतिविधिमा संलग्नलाई कानुनी कारबाहीको दायरामा ल्याउन माग गरेको हो ।
अभियानका अनुसार पछिल्लो समय धनुषामा लागुऔषधको अवैध कारोबार र दुव्र्यसनको समस्या बढ्दै गएको छ ।
यसले युवाको भविष्य, पारिवारिक वातावरण र समग्र सामाजिक सुरक्षामा चुनौती थपेको अभियानको ठहर छ । लागुऔषधको दुव्र्यसनसँगै चोरीलगायतका आपराधिक घटनाप्रति समेत गम्भीर हुनुपर्ने अभियानले जनाएको छ ।
त्यस्तै, सामाजिक सञ्जालको दुरुपयोग गरी अभद्र टिप्पणी गर्ने, गलत सूचना फैलाउने, व्यक्तिको चरित्रहत्या गर्ने तथा धार्मिक र जातीय सद्भावमा खलल पु¥याउने गतिविधि नियन्त्रण गर्न पनि अभियानले सरकारको ध्यानाकर्षण गराएको छ ।
ज्ञापनपत्रमा जनकपुरधाम उपमहानगरपालिका-५ मा अमिन सफीमाथि भएको घटनाको विषयसमेत उठाइएको छ ।
अभियानले उक्त घटनाको निष्पक्ष छानबिन गरी घटनामा संलग्न मुख्य दोषी तथा सहयोगी भनिएकाहरूलाई समेत प्रमाणका आधारमा कानुनी कारबाही गर्न माग गरेको छ ।
अभियानका संयोजक जितेन्द्र महासेठले सामाजिक सञ्जालमा भ्रामक सूचना फैलाउने, अतिरञ्जित टिप्पणी गर्ने र युवालाई आपराधिक गतिविधितर्फ आकर्षित गर्ने समूहलाई नियन्त्रण गर्न राज्यले प्रभावकारी भूमिका निर्वाह गर्नुपर्ने बताए ।
