काठमाडौं, २४ असोज । भारतको राजधानी नयाँ दिल्लीमा जेनजी नेतृत्वको क्रोच जनता पार्टी (सीजेपी) ले शनिबार गर्न लागेको विरोध प्रदर्शनलाई लक्षित गर्दै सुरक्षा व्यवस्था कडा पारिएको छ।
सम्भावित प्रदर्शनलाई ध्यानमा राख्दै २५० भन्दा बढी रेल सेवा र ४५ वटा मेट्रो स्टेसन बन्द गरिएका छन्। निर्वाचन प्रणालीमा सुधार र मतदाता नामावलीबाट ठूलो संख्यामा नाम हटाइएको आरोप लगाउँदै सीजेपीले प्रमुख निर्वाचन आयुक्त ज्ञानेश कुमारको राजीनामा माग गरेको छ।
भारतको निर्वाचन आयोगले भने उक्त आरोप अस्वीकार गर्दै आएको छ। प्रहरीले प्रदर्शनको अनुमति नदिएको बताए पनि पार्टीका नेताहरूले पूर्वनिर्धारित कार्यक्रमअनुसार जन्तरमन्तरमा प्रदर्शन गर्ने बताएका छन्।
सीजेपीका संस्थापक अभिजित दीपकले पक्राउ परे पनि निष्पक्ष निर्वाचनका लागि आफ्नो अभियान जारी रहने बताएका छन्। पार्टीका सहसंयोजक आशुतोष राङ्काले आन्दोलन शान्तिपूर्ण हुने प्रतिबद्धता जनाएका छन्। वरिष्ठ अधिवक्ता प्रशान्त भूषण, योगेन्द्र यादव र युट्युबर ध्रुव राठीलगायतले पनि प्रदर्शनलाई समर्थन गरेका छन्।
सुरक्षाका कारण नयाँ दिल्ली र हजरत निजामुद्दीन स्टेसनबाट सञ्चालन हुने २५० भन्दा बढी रेल सेवा रद्द गरिएको छ भने दिल्ली मेट्रोका ४५ स्टेसनका प्रवेश तथा निकास बन्द गरिएका छन्। यसले हजारौँ यात्रु प्रभावित भएका छन्।
रेल सेवा व्यापक रूपमा रद्द गरिएको निर्णयप्रति पूर्वरेल अधिकारी, यात्रु संगठन र कर्मचारी युनियनहरूले आलोचना गरेका छन्। उनीहरूले यसबाट सर्वसाधारणले ठूलो सास्ती भोग्नुपरेको बताएका छन्।
