काठमाडौं, १९ असोज । नेपाली कांग्रेसको १५औँ राष्ट्रिय महाधिवेशन अन्तर्गत आजदेखि बन्दसत्र सुरु हुँदैछ। बन्दसत्रअघि बिहान १० बजे केन्द्रीय कार्यसमितिको बैठक बस्नेछ।
केन्द्रीय कार्यसमितिमा प्रतिवेदनमाथि छलफल भएपछि बन्दसत्र अघि बढाइने कांग्रेस प्रवक्ता देवराज चालिसेले जानकारी दिएका छन्। बन्दसत्रमा सभापति गगनकुमार थापाले राजनीतिक प्रतिवेदन, महामन्त्रीले विधान संशोधनसम्बन्धी र कोषाध्यक्षले आर्थिक प्रतिवेदन प्रस्तुत गर्ने कार्यतालिका छ। सात हजारभन्दा बढी महाधिवेशन प्रतिनिधि बन्दसत्रमा सहभागी हुनेछन्।
यसैबीच, केन्द्रीय निर्वाचन समितिले पार्टीको नयाँ नेतृत्व चयनका लागि निर्वाचन कार्यक्रम सार्वजनिक गरेको छ। आज मतदाता नामावली प्रकाशन हुनेछ भने भोलि उम्मेदवारी दर्ता हुनेछ। असोज २१ गते उम्मेदवारको अन्तिम नामावली प्रकाशन गरी प्रचारप्रसारको समय दिइनेछ।
असोज २२ गते बिहान ७ बजेदेखि साँझ ५ बजेसम्म मतदान हुने निर्वाचन समितिले जनाएको छ। मतदान राष्ट्रिय सभा गृह, खुलामञ्च र प्रज्ञा भवनमा हुनेछ। मतदानपछि मतगणना सुरु गरिनेछ।
