काठमाडौं, १६ असोज । रुसी राष्ट्रपति भ्लादिमिर पुटिनले युक्रेनसँग लामो दूरीका आक्रमण रोक्ने प्रस्ताव अस्वीकार गर्दै रुसको सुरक्षा चुनौतीमा कडा प्रतिक्रिया दिने चेतावनी दिएका छन्।
बिहीबार मस्कोमा आयोजित भल्दाई राजनीतिक मञ्चमा बोल्दै पुटिनले रुसी तेल प्रशोधन केन्द्रमाथिको युक्रेनी आक्रमण रोक्ने र बदलामा युक्रेनी जहाजमाथि रुसले हमला नगर्ने प्रस्तावलाई अस्वीकार गरेका हुन्।
पुटिनले रुस वार्तामार्फत युद्ध अन्त्य गर्न तयार रहेको बताउँदै युद्धपछि युक्रेनलाई तटस्थ राष्ट्रका रूपमा हेर्न चाहेको उल्लेख गरे। साथै, रुसको कालिनिनग्राद क्षेत्रमा प्रत्यक्ष खतरा उत्पन्न भए परमाणु हतियारसहित सम्पूर्ण सैन्य क्षमता प्रयोग गर्न सकिने चेतावनी दिए।
नेटो महासचिव मार्क रुट्टेले भने यस्तो परमाणु धम्की अनुपयुक्त भएको प्रतिक्रिया दिएका छन्।
