काठमाडौं, ११ असोज । पूर्वप्रधानन्यायाधीश चोलेन्द्रशमशेर जबरालाई प्रहरीले परिवारको जिम्मा लगाएको छ।
शनिबार मध्यराति महाराजगञ्जस्थित निवासबाट पक्राउ गरिएका जबरालाई केही समयअघि परिवारको जिम्मा लगाइएको अपराध अनुसन्धान कार्यालयका एसपी रामेश्वर कार्कीले जानकारी दिए।
प्रहरीले सुरक्षा जोखिम रहेको भन्दै उनलाई रातारात कार्यालयमा ल्याइएको जनाएको थियो। यद्यपि, पक्राउको औपचारिक कारण सरकारले सार्वजनिक गरेको छैन।
जबरालाई भेट्न पुगेको राष्ट्रिय मानव अधिकार आयोगको टोलीलाई प्रहरीले भेट्न नदिएको जनाइएको छ। आयोगको टोली करिब ४५ मिनेट गेटमा बसेर फर्किएको थियो।
जबराका भाइ प्रभुशमशेरका अनुसार प्रहरीले ‘जेनजीबाट सुरक्षा खतरा’ रहेको भन्दै उनलाई पक्राउ गरेको जानकारी दिएको थियो। घटनामा प्रहरीले अपनाएको प्रक्रियामाथि कानुनविद्हरूले प्रश्न उठाएका छन्।
