काठमाडौ, ८ असोज । वैज्ञानिकहरूका अनुसार हाल विकसित भइरहेको एल निनो जलवायु घटना निकै शक्तिशाली बन्दै गएको छ। सेप्टेम्बर १९ मा मध्य–पूर्वी प्रशान्त महासागरको एक क्षेत्रमा समुद्री सतहको तापक्रम सामान्यभन्दा ३.०५ डिग्री सेल्सियस बढी मापन गरिएको छ। यो सन् २०१५ मा कायम भएको ३.०२ डिग्रीको दैनिक तापक्रम रेकर्डभन्दा बढी हो।
यद्यपि दीर्घकालीन सूचकांकका आधारमा हालको एल निनोले अहिलेसम्म नयाँ कीर्तिमान कायम गरिसकेको छैन। वैज्ञानिकहरूले यसको चरम अवस्था सन् २०२६ को अन्त्यतिर पुग्न सक्ने अनुमान गरेका छन्।
एल निनोका कारण विश्वका विभिन्न क्षेत्रमा मौसमको स्वरूप परिवर्तन हुन सक्छ। केही स्थानमा भारी वर्षा, बाढी र आँधीको जोखिम बढ्दा अन्य क्षेत्रमा खडेरी तथा डढेलोको सम्भावना बढ्न सक्छ। भारतमा मनसुनी वर्षा प्रभावित हुने तथा ब्राजिल, अष्ट्रेलिया र इन्डोनेसियालगायत क्षेत्रमा खडेरीको जोखिम बढ्न सक्ने वैज्ञानिकहरूको भनाइ छ।
मौसमविद्हरूले एल निनोको विकासक्रम र त्यसको सम्भावित प्रभावबारे निरन्तर निगरानी गरिरहेका छन्। यसको प्रभावले कृषि उत्पादन, खाद्य सुरक्षा र अर्थतन्त्रमा समेत असर पार्न सक्ने बताइएको छ।
