जनकपुर, ८ असोज । मधेश प्रदेश सरकारले सीमा सुरक्षा, नियमित गस्ती तथा शान्ति सुरक्षालाई थप प्रभावकारी बनाउन सशस्त्र प्रहरी बललाई २० थान मोटरसाइकल उपलब्ध गराएको छ ।
मधेश प्रदेश सरकारको गृह, सञ्चार तथा कानुन मन्त्रालयमा बिहीबार आयोजित कार्यक्रममा गृहमन्त्री फकीरा महतोले सशस्त्र प्रहरी बल मधेश प्रदेशका प्रमुख डिआइजी विष्णुप्रसाद भट्टलाई मोटरसाइकलको साँचो तथा ब्लुबुक हस्तान्तरण गरेका हुन् ।
प्रदेशका सीमावर्ती तथा संवेदनशील क्षेत्रमा सुरक्षा निकायको उपस्थिति र परिचालनलाई सहज बनाउने उद्देश्यले मोटरसाइकल उपलब्ध गराइएको मन्त्रालयले जनाएको छ । विशेषगरी खुला सीमा क्षेत्रमा हुने नियमित गस्ती, निगरानी तथा सुरक्षा व्यवस्थापनमा सवारीसाधनले सहयोग पुग्ने अपेक्षा गरिएको छ ।
मधेश प्रदेशका अधिकांश जिल्ला भारतसँग जोडिएका छन् । खुला सीमाका कारण हुने चोरी-तस्करी नियन्त्रण, सीमा निगरानी तथा विभिन्न सुरक्षा चुनौती सामना गर्न सुरक्षा निकायको नियमित गस्तीलाई महत्वपूर्ण मानिन्छ । सोही आवश्यकतालाई ध्यानमा राखेर सशस्त्र प्रहरीलाई मोटरसाइकल उपलब्ध गराइएको मन्त्रालयको भनाइ छ ।
मन्त्री महतोले आवश्यकताका आधारमा थप १० थान मोटरसाइकल उपलब्ध गराउने प्रक्रिया अघि बढिरहेको जानकारीसमेत दिए । प्रदेश सरकारले सुरक्षा निकायलाई आवश्यक पर्ने अन्य सवारीसाधन तथा स्रोतसाधन उपलब्ध गराउने तयारी गरिरहेको उनको भनाइ छ।
यसअघि बुधबार मात्रै मधेश प्रदेश सरकारले नेपाल प्रहरीलाई ३५ थान मोटरसाइकल हस्तान्तरण गरेको थियो। सशस्त्र प्रहरीलाई थप २० थान मोटरसाइकल उपलब्ध गराएसँगै प्रदेश सरकारले सुरक्षा
