काठमाडौं, ७ असोज । असोज ९ देखि ११ गतेसम्म अति भारी वर्षाको सम्भावना देखिएपछि सरकारले विपद् जोखिम न्यूनीकरणका लागि पूर्वतयारी थालेको छ।
मंगलबार जल तथा मौसम विज्ञान विभाग पुगेर जोखिमबारे जानकारी लिएपछि गृहमन्त्री सुदन गुरुङले सुरक्षा निकायलाई उच्च सतर्क अवस्थामा राखिएको बताए।
उनका अनुसार नदी तटीय क्षेत्रमा टोली परिचालन, उद्धार सामग्री तयारी र स्थानीय तहबाट पूर्वसूचना प्रवाहको व्यवस्था गरिएको छ। मन्त्री गुरुङले पदयात्रा तथा ट्रेकिङमा रहेका नागरिकलाई सुरक्षित स्थानतर्फ जान आग्रह गर्दै सबै निकायबीच प्रभावकारी समन्वय गर्न निर्देशन दिएका छन्।
विभागका अनुसार पश्चिमी न्यूनचापीय प्रणालीका कारण गण्डकी, लुम्बिनी र सुदूरपश्चिमका तराई क्षेत्रमा भारीदेखि धेरै भारी वर्षाको सम्भावना रहेकाले उच्च सतर्कता आवश्यक छ।
