काठमाडौं, ६ असोज । त्रिपुरेश्वरमा बसमा आगलागी हुँदा जलेर मृत्यु भएका चालकको पहिचान खुलेको छ ।
काठमाडौं प्रहरीका अनुसार मृतक मकवानपुरको इन्द्रसरोवर गाउँपालिका-सिस्नेरीका अर्जुन दोङ तामाङ हुन् । प्रहरीका अनुसार अर्जुनले अन्य व्यक्तिको नाममा जारी भएका सवारीचालक अनुमतिपत्र, नागरिकता र बैंक खातासमेत प्रयोग गर्दै आएको प्रारम्भिक अनुसन्धानबाट खुलेको छ ।
काठमाडौं प्रहरी परिसरका एसएसपी दिलिप घिमिरेले अर्जुनले दावा लामाको नाममा रहेको सवारीचालक अनुमतिपत्र प्रयोग गरेको पाइएको जानकारी दिए ।
प्रहरीका अनुसार २०८२ कात्तिकमा बालाजुमा बस पल्टिँदा तीन जना घाइते भएको घटनामा पनि अर्जुन संलग्न रहेको र त्यसपछि फरार रहेको खुलेको छ ।
उक्त घटनामा उनले सुनील तामाङको नाममा जारी लाइसेन्स प्रयोग गरेको प्रहरीको भनाइ छ । त्यस्तै, करिब तीन महिनाअघि मूलपानी क्षेत्रमा ट्राफिक प्रहरीसँग अभद्र व्यवहार गरेको घटनामा पनि उनले अर्कै व्यक्तिको नाममा जारी लाइसेन्स प्रयोग गरेको पाइएको छ ।
अर्जुनले अन्य व्यक्तिका परिचयपत्र तथा कागजात प्रयोग गरेको हुनसक्ने विषयमा थप अनुसन्धान भइरहेको प्रहरीले जनाएको छ ।
