काठमाडौं, ५ असोज । सर्वोच्च अदालतले जोखिमपूर्ण अवस्था नदेखिएसम्म पक्राउ परेका व्यक्तिलाई हत्कडी नलगाउन प्रहरीलाई आदेश दिएको छ।
न्यायाधीश डा. नहकुल सुवेदी र शान्तिसिंह थापाको इजलासले भाग्ने जोखिम, हिंसात्मक व्यवहार वा आफू/अरूलाई क्षति पुर्याउने सम्भावना भएमा वस्तुनिष्ठ मूल्यांकन गरी आवश्यक अवस्थामा मात्रै हत्कडी लगाउन सकिने आदेश दिएको हो।
हत्कडी लगाउनैपर्ने अवस्था भए त्यसको कारण र प्रयोगको अभिलेख राख्न पनि सर्वोच्चले प्रहरीलाई निर्देशन दिएको छ। पक्राउ पर्दैमा सबैलाई हत्कडी लगाउने अभ्यास संवैधानिक तथा कानुनी व्यवस्थाको मर्मअनुकूल नभएको अदालतको भनाइ छ।
हत्कडीको गैरकानुनी प्रयोग भएको दाबी गर्दै विवेक चौधरी, रोशन आउजा र विकास यादवले दायर गरेको रिटमा सर्वोच्चले यस्तो आदेश दिएको हो।
