काठमाडौं, २ असोज । रसुवाको भोटेकोशी क्षेत्रमा आएको विनाशकारी बाढीपछि बेपत्ता भएकाहरूको खोजी गर्ने क्रममा माथिल्लो त्रिशूली–१ जलविद्युत् आयोजनाको सुरुङबाट ६ जनाको शव फेला परेको छ ।
नेपाली सेनाका अनुसार आयोजनाको अडिट-३ टनेलभित्र ढलानका लागि बनाइएको फलामे डन्डीको जालीको भित्री भागमा अल्झिएको अवस्थामा ती शव फेला परेका हुन् ।
खोजी तथा उद्धार टोलीले ग्याँस कटर र रोटरी रेस्क्यु उपकरणको प्रयोग गरी शवहरूलाई सुरुङबाट बाहिर निकालेको हो । भदौ १० गते भोटेकोशी क्षेत्रमा आएको बाढी तथा पहिरोका कारण ठूलो जनधनको क्षति भएको थियो ।
बाढीपछि सम्पर्कविहीन भएका व्यक्तिहरूको खोजी तथा उद्धारका क्रममा सुरुङ, नदी किनार तथा अन्य जोखिमयुक्त क्षेत्रमा खोजी कार्यलाई निरन्तरता दिइएको छ ।
सेनाले सुरुङभित्र हिलोले छोपिएको अवस्थामा अन्य शवजस्तो देखिने आकृति पनि भेटिएको जनाएको छ । सुरुङभित्रको अवस्था जोखिमपूर्ण रहेकाले आवश्यक सुरक्षा उपकरण तथा उद्धार प्रविधिको प्रयोग गर्दै खोजी कार्य भइरहेको सेनाले जनाएको छ ।
