काठमाडौं, ५ भदौँ । काठमाडौंको शंखमुलस्थित एक होस्टलमा कुटपिट तथा धारिलो हतियार प्रहारबाट एक युवकको हत्या भएको छ।
घटनामा संलग्न रहेको आरोपमा प्रहरीले एक जनालाई पक्राउ गरेको छ भने अर्का एक जना फरार रहेको जनाएको छ । काठमाडौं महानगरपालिका १० शंखमुलस्थित भ्याली ब्वाइज होस्टलमा भएको घटनामा दाङको घोराही उपमहानगरपालिका १७ घर भई हाल सोही होस्टलमा बस्दै आएका २२ वर्षीय बसन्त कालाथोकीको मृत्यु भएको हो ।
प्रहरीका अनुसार कालाथोकीमाथि सोही होस्टलमा बस्ने बाराको कलैया ३ का १८ वर्षीय शेखर यादव र करिब २० वर्षीय प्रमित पटेलले कुटपिट गर्नुका साथै धारिलो हतियार प्रहार गरेका थिए ।
घटनामा गम्भीर घाइते भएका कालाथोकीको टाउको र घाँटीमा चोट लागेको थियो । घाइते कालाथोकीलाई तत्काल उपचारका लागि काठमाडौंको मिनभवनस्थित निजामती कर्मचारी अस्पताल लगिएको थियो ।
उनको अवस्था गम्भीर रहेको र बोल्नसमेत नसक्ने अवस्थामा उपचार भइरहेकोमा चिकित्सकले उपचारकै क्रममा मृत घोषणा गरेका हुन्। घटनापछि प्रहरीले शेखर यादवलाई नियन्त्रणमा लिएर अनुसन्धान अघि बढाएको छ । घटनामा संलग्न रहेको भनिएका प्रमित पटेल भने फरार रहेको र उनको खोजी भइरहेको प्रहरीले जनाएको छ ।
