नुवाकोट, ३० साउन । नुवाकोटको टोखा–छहरे सडकखण्डअन्तर्गत शिवपुरी गाउँपालिका–७ थानाभञ्ज्याङमा रोकिराखेको बस आफैँ गुडेर दुर्घटना हुँदा दुई तीर्थयात्रीको मृत्यु भएको छ भने तीन जना घाइते भएका छन् ।
दुप्चेश्वर महादेव दर्शनका लागि काठमाडौंँबाट आएको बा.प्र.०८–००१ ख ००५२ नम्बरको बस चालक र यात्रु खाजा खान गएको समयमा आफैँ गुडेर सडकबाट करिब ५० मिटर तल खसेको प्रहरीले जनाएको छ।
बसले सडकमा रोकिराखेको एउटा ईभी भ्यानलाई समेत ठक्कर दिएको थियो । दुर्घटनामा काभ्रेको बनेपा–८ की ५४ वर्षीया कृष्णमाया प्रजापती र रामेछापको खाँडादेवी–२ की ६५ वर्षीया उदयमाया खत्रीको मृत्यु भएको प्रहरीले जनाएको छ ।
घाइते सर्लाहीकी सुजता पोखरेल, काभ्रेको शर्मिला श्रेष्ठ र दोलखाकी ज्ञानु श्रेष्ठको काठमाडौंमा उपचार भइरहेको छ । प्रहरीले बस चालक काभ्रेको पाँचखाल–७ का सीताराम आचार्यलाई नियन्त्रणमा लिएर घटनाबारे अनुसन्धान गरिरहेको जनाएको छ ।
