काठमाडौं, २३ जेठ । पूर्वप्रधानन्यायाधीश सुशीला कार्कीले अबको समय साहित्य सिर्जनामा केन्द्रित गर्ने बताएकी छन्।
ललितपुरमा आयोजित काठमाडौं कलिङ्ग साहित्य महोत्सव मा बोल्दै उनले आफूलाई केवल न्यायपालिका वा सार्वजनिक जीवनको भूमिकाबाट मात्र नभई साहित्यप्रेमीका रूपमा पनि बुझ्न आग्रह गरिन्।
कार्कीले न्यायपालिका र सार्वजनिक जीवनमा निर्वाह गरेको भूमिका कर्तव्यको उपज भए पनि साहित्य आफ्नो अन्तरमनको रुचि रहेको बताइन्।
उनले १९९० को जनआन्दोलनका क्रममा जेल बस्दा महिला बन्दीहरूको पीडा नजिकबाट देखेपछि ‘कारा’ उपन्यास लेखेको स्मरण गरिन्।
सेवा निवृत्तिपछि प्रकाशित उक्त कृतिजस्तै आफ्नासँग अझै धेरै कथा, उपन्यासका अवधारणा तथा अधुरा पाण्डुलिपि रहेको उल्लेख गर्दै आगामी दिनमा ती कृतिहरू सार्वजनिक गर्ने योजना रहेको जानकारी दिइन्।
कार्यक्रममा नेपाल र भारतका प्रतिष्ठित साहित्यकारहरूको उल्लेखनीय सहभागिता रहेको थियो।
