काठमाडौं, २२ जेठ । विशेष अदालतले त्रिभुवन अन्तर्राष्ट्रिय विमानस्थल भन्सार कार्यालयका नायब सुब्बा (नासु) रेवन्त खड्कालाई भेपमार्फत भएको सुन तस्करी तथा भ्रष्टाचार सम्बन्धी मुद्दामा पुर्पक्षका लागि थुनामा पठाउन आदेश दिएको छ ।
विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र विदुर कोइरालाको संयुक्त इजलासले खड्कालाई थुनामा राखेर अनुसन्धान तथा मुद्दाको प्रक्रिया अगाडि बढाउन आदेश दिएको हो ।
अभियोगअनुसार, विदेशबाट सुटकेसभित्र विद्युतीय चुरोट (भेप) मा लुकाएर ल्याइएको सुन बरामद भएपछि उक्त सामान भन्सारको गोदाममा राखिएको थियो । गोदामको जिम्मेवारीमा रहेका खड्काले सुटकेसभित्र सुन रहेको जानकारी पाएपछि सुनसहितका भेप हटाई अन्य भेप राखेको आरोप लगाइएको छ ।
अनुसन्धानका क्रममा उनले गोदामबाट निकालेको सुन न्यूरोड क्षेत्रमा बिक्री गरेको खुलेको अख्तियारको दाबी छ । यसअघि पनि सुन तस्करीसम्बन्धी अर्को मुद्दामा उनी दोषी ठहर भइसकेका व्यक्ति हुन् । यस प्रकरणमा अख्तियार दुरुपयोग अनुसन्धान आयोगले पूर्वसभामुख कृष्णबहादुर महरा, उनका छोरा राहुल महरा तथा अन्य व्यक्तिहरूसहित खड्काविरुद्ध भ्रष्टाचार र सुन तस्करीमा संलग्न रहेको आरोपसहित मुद्दा दायर गरेको थियो ।
अदालतले खड्काको जिम्मामा रहेको बरामद सामानमा हेरफेर भएको, अन्य आरोपितहरूको बयान तथा उनको बैंक खातामा रकम जम्मा भएको विवरणसमेत देखिएको भन्दै थुनामा राख्न पर्याप्त आधार रहेको निष्कर्ष निकालेको छ।
