काठमाडौं, ६ जेष्ठ । राष्ट्रिय स्वतन्त्र पार्टी (रास्वपा) का केही सांसदहरूले संसदमा बोल्ने तयारीका क्रममा कृत्रिम बुद्धिमत्ता (एआई) उपकरण, विशेषगरी च्याटजीपीटीको प्रयोग गरेको विषय चर्चामा आएपछि पार्टी नेतृत्वले त्यसप्रति सावधानी अपनाउन निर्देशन दिएका छन् ।
पार्टीकी सचेतक क्रान्तिशिखा धितालले सांसदहरूलाई संसदमा प्रस्तुत हुने विषयवस्तु आफ्नै अध्ययन, अनुभव र तथ्यका आधारमा तयार गर्न आग्रह गर्दै एआईमा अत्यधिक निर्भर नहुन सुझाव दिएकी हो ।
रास्वपाका एक सांसदका अनुसार धितालले अनौपचारिक छलफल र आन्तरिक समूहमा “विषयवस्तु नभए नबोले पनि हुन्छ, तर च्याटजीपीटीको भरमा प्रस्तुत हुनु उपयुक्त होइन” भन्ने धारणा राखेकी थिइन् ।
पछिल्लो समय संसदमा एआईको प्रयोगबारे विभिन्न तहमा बहस भइरहेका बेला केही सांसदहरूले च्याटजीपीटीको सहायतामा धारणा राखेको भन्ने टिप्पणी सार्वजनिक भएपछि पार्टीले आन्तरिक रूपमा सचेत गराएको बताइएको छ ।
