काठमाडौं, ३१ वैशाख । सांसद रामकुमारी झाँक्रीले सरकारले निजी क्षेत्रलाई काम गर्ने वातावरण दिनुको सट्टा भय र त्रास सिर्जना गरिरहेको आरोप लगाएकी छन्।
राष्ट्रिय सभाको बिहीबारको बैठकमा बोल्दै उनले सरकारले निजी क्षेत्रलाई æपहिले थुन्ने अनि सुन्नेÆ प्रवृत्ति अपनाएको भन्दै आलोचना गरिन् ।
झाँक्रीले सरकारको आगामी आर्थिक वर्षको नीति तथा कार्यक्रम पुरानै कार्यक्रमको निरन्तरता मात्रै भएको टिप्पणी गर्दै नयाँपन र स्पष्ट दिशा नभएको बताइन् । जनताले दिएको ठूलो जनमतलाई सरकारले परिवर्तन र सुधारका लागि उपयोग गर्न नसकेको उनको भनाइ थियो ।
उनले सुशासन र सेवा प्रवाहको नाममा नागरिकता, राहदानी र लालपुर्जा वितरण मात्रै पर्याप्त नहुने उल्लेख गर्दै सबै वर्ग र समुदायको मानवअधिकार तथा मौलिक हक सुनिश्चित गर्न सरकारसँग आग्रह गरिन् ।
