काठमाडौं, ३० वैशाख । चालु वसन्त आरोहण सिजनमा हिमाल चढ्ने क्रममा हालसम्म पाँच जनाको मृत्यु भएको छ ।
पर्यटन विभागका अनुसार सगरमाथा क्षेत्रमा तीन जना र मकालु क्षेत्रमा दुई जनाको मृत्यु भएको हो । विभागले दिएको जानकारीअनुसार २० वैशाखमा सगरमाथा आधार शिविर क्षेत्रमा माउन्टेन गाइड लाक्पा डेन्डी शेर्पाको निधन भएको थियो ।
त्यसपछि २७ वैशाखमा खुम्बु आइसफल क्षेत्रमा अर्का माउन्टेन गाइड विजय घिमिरेको मृत्यु भएको बताए । यस्तै, २८ वैशाखमा सगरमाथाको तेस्रो शिविरमा माउन्टेन गाइड फुरा गेल्जेन शेर्पाले ज्यान गुमाएका छन् ।
मकालु हिमालतर्फ २१ वैशाखमा आरोही डेभिड रुविनेकको मृत्यु भएको थियो भने २८ वैशाखमा आरोही जोहानेसेन शेलीको पनि निधन भएको विभागले जनाए ।
हरेक वर्ष वसन्त ऋतुमा हिमाल आरोहणका लागि ठूलो संख्यामा विदेशी तथा स्वदेशी आरोही नेपाल आउने गर्छन् । अत्यधिक उचाइ, मौसमको प्रतिकूलता, अक्सिजनको कमी तथा अन्य प्राकृतिक चुनौतीका कारण यस सिजनमा दुर्घटना र मानवीय क्षतिको जोखिम उच्च रहने गर्दछ ।
