काठमाडौं, २९ बैशाख । स्याङ्जाको पुतलीबजार नगरपालिका–४ का वडा अध्यक्ष शिवबहादुर थापा मानव बेचबिखन तथा ओसारपसारसम्बन्धी आरोपमा पक्राउ परेको छ ।
मानव बेचबिखन अनुसन्धान ब्युरोको टोलीले उनलाई सोमबार कास्कीबाट पक्राउ गरेको बताए । ब्युरोका प्रहरी उपरीक्षक राजन लिम्बुका अनुसार पीडित पक्षबाट परेको उजुरीका आधारमा थापालाई नियन्त्रणमा लिइएको हो ।
घटनासम्बन्धी थप अनुसन्धान भइरहेको प्रहरीले जनाए । थापा २०७९ सालको स्थानीय तह निर्वाचनमा नेपाली कांग्रेसबाट निर्वाचित भएका थिए । उनले एमालेका उम्मेदवार रुद्रप्रसाद पोखरेललाई पराजित गर्दै वडा अध्यक्ष पद जितेका थिए ।
निर्वाचनपछि केही समय वडा कार्यालयको जिम्मेवारी सम्हालेका थापा २०८० भदौमा स्वास्थ्य उपचारको बहानामा सम्पर्कविहीन भएका थिए । पछि उनी अमेरिका पुगेको खुलेको थियो । स्थानीयका अनुसार उनले केही व्यक्तिलाई अवैध बाटो प्रयोग गरी अमेरिका पठाउने तथा रकम लिएर अलपत्र पारेको आरोप खेप्दै आएका थिए । करिब साढे दुई वर्ष अमेरिका बसेपछि उनी हालै नेपाल फर्किएका थिए ।
थापा विदेशमा रहेका अवधिमा पनि नगरपालिकाबाट सेवा–सुविधाबापत रकम भुक्तानी भएको विषयले स्थानीय तहमा चर्चा पाएको थियो । पछि भने नगरपालिकाले उनको सेवा–सुविधा रोकिएको जनाए ।
नेपाल फर्किएपछि पुनः वडा कार्यालयमा सक्रिय देखिएका थापा अहिले मानव बेचबिखनसम्बन्धी मुद्दामा प्रहरी हिरासतमा रहेका छन् । प्रहरीले घटनाका थप तथ्य संकलन तथा अनुसन्धान प्रक्रिया जारी रहेको जनाए ।
