काठमाडौं, २६ वैशाख । काठमाडौंमा आगामी सोमबारदेखि सरकारी कार्यालयहरूमा राष्ट्रिय सरसफाइ सप्ताह सुरु हुने भएको छ ।
सरकारले जेठ १ गतेसम्म संघ, प्रदेश र स्थानीय तहका सबै कार्यालयमा सरसफाइ अभियान सञ्चालन गर्ने निर्णय गरेको हो । प्रधानमन्त्री तथा मन्त्रिपरिषद् कार्यालयले सरसफाइ सप्ताह सञ्चालनसम्बन्धी मार्गनिर्देशन २०८३ जारी गरिसकेको जनाएको छ ।
अभियानको उद्देश्य सरकारी निकाय तथा शैक्षिक संस्थामा स्वच्छ, स्वस्थ र व्यवस्थित वातावरण कायम गर्नु रहेको बताइएको छ । स्वास्थ्य तथा जनसङ्ख्या मन्त्रालयको समन्वयमा सोमबार बिहान वीर अस्पतालबाट अभियानको शुभारम्भ गरिनेछ भने देशभरका अस्पतालमा पनि एकैसाथ कार्यक्रम सुरु हुनेछ ।
अभियानअन्तर्गत कार्यालय, शौचालय, सार्वजनिक स्थल, क्यान्टिन, फोहर व्यवस्थापन तथा सेवाग्राही अनुभवसम्बन्धी मापदण्ड पालना गर्नुपर्ने व्यवस्था गरिएको छ ।
