जय कुँवर
जनकपुर, २६ वैशाख । लागूऔषध दुव्र्यसन न्यूनीकरण तथा युवा पुस्तालाई कुलतबाट जोगाउने उद्देश्यले धनुषामको धनौजीमा विद्यार्थी लक्षित सचेतनामूलक कक्षा सञ्चालन गरिएको छ ।
कार्यक्रममा लागूऔषध दुव्र्यसन न्यूनीकरणमा विद्यार्थीको भूमिका, लागूऔषधबाट बच्ने उपाय तथा सम्बन्धित कानुनी व्यवस्था विषयमा जानकारी गराइएको थियो ।
सशस्त्र प्रहरी बल नेपाल बिओपि धनौजिका बिओपि प्रमुख सशस्त्र प्रहरी निरीक्षक अमृत बहादुर कठायतले पछिल्लो समय लागूऔषधको प्रयोग बढ्दै जाँदा समाजमा विभिन्न प्रकारका अपराधसमेत बढिरहेको बताएका छन् ।
उनले लागूऔषध दुव्र्यसनले व्यक्ति, परिवार र समाजलाई नै नकारात्मक असर पार्ने भएकाले यसको नियन्त्रणमा सबै पक्ष जिम्मेवार बन्नुपर्ने बताए ।
निरीक्षक कठायतले विशेषगरी विद्यार्थी तथा युवावर्ग लागूऔषध प्रयोगको उच्च जोखिममा रहने भएकाले समयमै सचेतना आवश्यक रहेको उल्लेख गरे ।
उनले साथीको दबाब, गलत संगत, सामाजिक सञ्जालको प्रभाव तथा जिज्ञासाका कारण धेरै युवाहरू कुलतमा फस्ने गरेको भन्दै सचेत रहन आग्रह गरे ।
उनले लागूऔषध सेवन, ओसारपसार तथा कारोबार सम्बन्धी कानुनी व्यवस्थाबारे पनि जानकारी गराउँदै नेपालमा लागूऔषध सम्बन्धी अपराधमा कडा कानुनी सजायको व्यवस्था रहेको बताए ।
लागूपदार्थ सेवनले अपराध बढेको छ, यसलाई नियन्त्रण गर्न सम्पूर्ण समाज सजग हुनुपर्छ, उनले भने । कार्यक्रममा विद्यार्थीहरूलाई लागूऔषधबाट बच्ने उपाय, आत्मविश्वास वृद्धि, सकारात्मक संगतको महत्व तथा परिवार र विद्यालयको भूमिकाबारे समेत जानकारी दिइएको थियो ।
सहभागी विद्यार्थीहरूले यस्ता कार्यक्रमले आफूहरूलाई सचेत बन्न मद्दत पुगेको बताएका थिए । स्थानीय स्तरमा लागूऔषधविरुद्ध निरन्तर सचेतनामूलक अभियान सञ्चालन गरिने आयोजक पक्षले जनाएको छ ।
