काठमाडौं, २३ वैशाख । प्रमुख प्रतिपक्षी दल नेपाली कांग्रेसले संवैधानिक परिषद्सम्बन्धी अध्यादेशप्रति संसद्मा विमति जनाउने निर्णय गरेको छ ।
सिंहदरबारमा बसेको संसदीय दल बैठकले सरकारद्वारा ल्याइएको अध्यादेशप्रति असहमति जनाउने निष्कर्ष निकालेको हो । कांग्रेसले आफ्नो धारणा संसद्मा राख्ने जनाएको छ ।
बैठकमा सार्वजनिक खरिद तथा सार्वजनिक पदाधिकारी पदमुक्तिसम्बन्धी अध्यादेशबारे पनि छलफल भएको थियो । यी विषयमा पनि संसद्मा आफ्ना धारणा प्रस्तुत गर्ने निर्णय गरिएको कांग्रेसले जनाएको छ ।
कांग्रेसका अनुसार सरकारको आगामी प्रतिक्रिया र प्रक्रियाका आधारमा आफ्नो थप रणनीति तय गरिनेछ ।
