काठमाडौं, २३ वैशाख । काठमाडौंको इन्द्रचोकस्थित एक गहना पसलमा पेस्तोल देखाएर लुटपाट प्रयास गर्ने तीन जनालाई प्रहरीले पक्राउ गरेका छन् ।
पक्राउ पर्नेमा भक्तपुर, काठमाडौं र ललितपुरका तीन जना रहेका छन् । उनीहरूलाई जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयको संयुक्त टोलीले नियन्त्रणमा लिएको हो ।
प्रहरीका अनुसार उनीहरूले १७ वैशाखमा गहना पसलमा हतियार देखाएर लुटपाट प्रयास गरेका थिए । उक्त घटनामा पसलमा रहेकी एक महिलाले प्रतिकार गरेपछि उनीहरू भाग्न बाध्य भएका थिए ।
सो घटनाको भिडियो सामाजिक सञ्जालमा व्यापक रूपमा फैलिएको थियो । अनुसन्धानका क्रममा सोही समूहले यसअघि पनि काठमाडौंको मांसान गल्लीस्थित पसलमा सुन, नगद, मोबाइल र सीसी क्यामेरा लुटेको खुलेको छ ।
पक्राउ परेकाबाट पेस्तोल, गोली, म्यागजिन, घटनामा प्रयोग भएका कपडा र स्कुटर समेत बरामद गरिएको प्रहरीले जनाएको छ ।
