काठमाडौं, २३ वैशाख । थाइल्याण्डस्थित नेपाली दूतावासले कम्बोडियामा अलपत्र परेका ६३ नेपाली नागरिकका लागि एकतर्फी यात्रा अनुमति पत्र (ट्राभल डकुमेन्ट) तयार गरी पठाइसकेको जनाएका छन् ।
अनलाइन फाराम भरेका व्यक्तिहरूका लागि यो प्रक्रिया अघि बढाइएको हो भने बाँकीलाई पनि शीघ्र विवरण बुझाउन आग्रह गरिएको छ । यसअघि दूतावासले ४६ नेपालीको उद्धार गरी स्वदेश फर्काइसकेको थियो । तीमध्ये धेरैलाई अवैध अनलाइन स्क्यामिङ केन्द्र तथा क्यासिनोमा काम गर्न बाध्य बनाइएको थियो ।
यसैबीच, कम्बोडिया सरकारले अनलाइन ठगी नियन्त्रण गर्न कडा कानून लागू गर्दै ५ लाख अमेरिकी डलरसम्म जरिवाना र आजीवन कैदसम्मको सजाय व्यवस्था गरेको छ । दूतावासले नेपाली नागरिकलाई पर्यटकीय भिसामा रोजगारीका लागि विदेश नजान, भिसा अवधि नाघेर नबस्न र कुनै पनि गैरकानुनी गतिविधिमा संलग्न नहुन चेतावनी दिएको छ ।
साथै, वैदेशिक रोजगारका लागि जानुअघि अनिवार्य रूपमा श्रम स्वीकृति लिन र रोजगारदाताको विश्वसनीयता जाँच गर्न आग्रह गरिएको छ । मानव बेचबिखनमा परेका वा शंका लागेका घटनामा सम्बन्धित निकायमा उजुरी दिन पनि दूतावासले आह्वान गरेको छ ।
