काठमाडौ,१९ बैसाख । नेकपा एमाले निकट महिला संगठनले राजधानीको माइतीघर मण्डला मा धर्ना प्रदर्शन गरेको छ।
शनिबार आयोजित उक्त धर्नामा एमाले सचिव महेश बस्नेत की पत्नी अम्बिका बस्नेत सहित पक्राउ परेका महिलाहरूको रिहाइको माग गरिएको हो ।
प्रदर्शनमा सहभागी महिलाहरूले अदालतबाट टुंगिसकेको विषयलाई लिएर किन निरन्तर चरित्र हत्या भइरहेको छ ? अम्बिका बस्नेतलगायतलाई तत्काल रिहा गर, छाडातन्त्र कहिलेसम्म ? जस्ता नारा लेखिएका प्लेकार्ड बोकेका थिए ।
उनीहरूले सम्बन्धित घटनामा न्यायिक प्रक्रियाको सम्मान गर्न र अनावश्यक रूपमा व्यक्तिमाथि आरोप लगाउने प्रवृत्ति रोक्न आग्रह गरेका छन् ।
गत वैशाख १४ गते माइतीघरमै शोभा पाठक र अम्बिका बस्नेतबीच भएको विवाद हातहालाहालको स्थितिसम्म पुगेको थियो । सो घटनापछि प्रहरीले अम्बिका बस्नेतसहित केही महिलाहरूलाई नियन्त्रणमा लिएको थियो । त्यसयता उक्त घटनालाई लिएर राजनीतिक र सामाजिक बहस पनि चर्किएको छ ।
प्रदर्शनकारीहरूले शोभा पाठक र महेश बस्नेतबीच लामो समयदेखि चल्दै आएको विवादलाई राजनीतिक रंग दिन खोजिएको आरोप लगाउँदै निष्पक्ष छानबिनको माग गरेका छन् ।
