काठमाडौं, १७ वैशाख । नेपाली कांग्रेसका नेता डा. शेखर कोइरालाले बोलाएको बागमती प्रदेशस्तरीय छलफलमा सहभागी अधिकांश नेताहरूले विशेष महाधिवेशनका कारण पार्टी एकता कमजोर भएको निष्कर्ष निकालेका छन् ।
बालुवाटारस्थित भएको छलफलमा नेताहरूले पार्टीभित्र बढ्दो विवाद र एकता कायम हुन नसकेकोप्रति चिन्ता व्यक्त गरेका थिए ।
सहभागी एक नेताका अनुसार, विशेष महाधिवेशनकै विषयले अहिलेको विवाद सिर्जना गरेकोमा धेरैजसो सहमत देखिएका थिए ।
छलफलमा क्रियाशील सदस्यता अद्यावधिक प्रक्रियामाथि पनि प्रश्न उठाइएको छ । नेताहरूले १५ औं महाधिवेशनका लागि सदस्यता नवीकरण भइसकेको अवस्थामा पुनः अद्यावधिक गर्ने निर्णयमाथि शंका व्यक्त गरेका छन् ।
