काठमाडौँ, १५ वैशाख। आजदेखि देशभर विद्यालय तहको नयाँ शैक्षिक सत्र औपचारिक रूपमा सुरु भएको छ।
सरकारको निर्णयअनुसार प्रत्येक वर्ष वैशाख १५ गतेदेखि शैक्षिक सत्र सुरु गर्ने व्यवस्था गरिएको हो।
यसअघि वैशाख २ गतेदेखि सत्र सुरु हुने प्रचलन रहे पनि वार्षिक परीक्षा नसकिँदै निजी विद्यालयले भर्ना लिन थालेपछि र इन्धन आपूर्तिमा देखिएको समस्यालाई मध्यनजर गर्दै मिति सारिएको हो।
यद्यपि, केही स्थानीय तहको सहजीकरणमा वैशाख १५ अघि नै भर्ना भइसकेको पाइएको छ। सरकारले निजी विद्यालयले कानूनविपरीत लिएको भर्ना तथा अतिरिक्त शुल्क फिर्ता गराउन निर्देशन दिइसकेको छ।
शिक्षा मन्त्रालयले निर्धारित मापदण्डबाहेकका शुल्क असुलीमा कानूनी कारबाही अघि बढाउन स्थानीय तहलाई आग्रह गरेको छ।
यसैबीच, सर्वोच्च अदालतले परीक्षा नतिजा प्रकाशित नभई र आवश्यक प्रमाणपत्र उपलब्ध नभएसम्म भर्ना प्रक्रिया सुरु नगर्न अन्तरिम आदेश दिएको छ।
अदालतले शैक्षिक सत्र सुरु भएपछि मात्र कानूनी रूपमा भर्ना प्रक्रिया सञ्चालन गर्न निर्देशन दिएको छ।
